Po s'economia de Sabarussa est stetiu meda importanti su frumini Tirso chi passada accanta de sa bidda.

S'economia est stetia sempri de tipu agriculu e pastorali, poita ddui funti terras meda saliosas. In is ùrtimus annus at tentu un crescimentu in su tertziariu e funti nascias meda attividadis edilìtzias, artigianalis, de commerciu. De arregodai sa presèntzia in is annus passaus de calincuna attividadis importanti, comenti s'Olearia, indùstria po bogai ollu de sa sansa (in is annus settanta) e su fabbricu innui si triballant is cunservas de tramàttiga, fattu de sa Sociedadi torregiani in su 1910, su primu de tottu sa Sardigna.Sabarussa est stetia in tempus romanus meda importanti comenti centru agricolu, du dimostrada su dinai agattau in su sattu chi est de su 108 a.C.

Sa cultura latina in sa masseritzia de Sabarussa est ammostada de is fueddus, de sa trassa de is ainas e de is tènnicas chi ancora ddu i funti. Meda interessanti est po custu fattu su manigiu de is bingias, difatti Sabarussa est stetia meda nomonada po sa crannaccia, aidi chi at pigau su nomini de un fueddu latinu, vernacula, chi est a nai aidi de su logu.

Sa crannaccia, siat s'aidi chi su binu,  tenit in Sabarussa, ma in is biddas chi laccanant comenti Simaghis, Siimajori e Tzorfoliu, arraxinas de sa cultura latina, tanti ca podeus nai ca bollendi connosci su manigiu de sa bingia e de su binu de Columella, ddu podit fai connoscendi su manigiu de Sabarussa ca at sighiu cussu de sa Roma de Virgilio, Catone e Columella.

Fintzas is cannas chi srebint po spalliera funti tottunu cun cussas chi contzillanta is georgicus latinus e cun is cannas a tres peis si fait sa bingia comenti in is cùccurus de su Laziu.

Is Romanus iant bettiu a Sabarussa fintzas sa produtzioni de su làdrini e de is tebias in localidadi "Cu' e Forru" (fora de sa bidda, a nord-ovest) segundu certus paperis antigus fiat accanta de sa biddixedda (sperdia de sa pesta de su sec.XIV) de Biddalonga chi fiat in su logu tzerriau S. Barbara.

Accoa, candu fiat lompia sa cresia Grega, is paras e is eremitas gregus-ortodossus iant imparau sa genti de sa bidda a fai su làdrini in sa manera orientali cun su ludu e sa palla, po fai is domus, ponendi in is fundamentas sa pedra boddia in is nuraghis de "Zira" e "Santu Gregoriu".

De una pariga de annus, est stetiu torrau a scoberri s'impreu de custu materiali chi benit torrau a produsi in cantidadi in sa zona de is artigianus de sa bidda.

Su sàtu de Sabarussa est pretzìu in duas partis meda dissimbillantis s'una de s'atra: su "Gragori", trettu no in pàris, siccu impreada po pasci; su "Bennaxi" terra tottu in pàris, abbada, chi si alladiada in tottu sa baddi de su Tirsu, innui si podint prantai medas cosas, cancioffa, forastiu, maboni, obia, axia.

Est innoi, in custa terra chi at tentu manigiu meda sa produtzioni de s'aidi, po fai sa crannaccia, in is annus passaus fiat sa coltura prus importanti. Prova ndi funti tottus is cantinas spaniadas in sa bidda e sa sagra chi si fait dogna annu in su mesi de Capudanni. Propriu gratzias a sa crannaccia, Sabarussa est connotta in tottu sa Sardigna e fora de custa puru; difatti  sa crannaccia de su bennaxi est ùnica.

In is urtimus annus s'abbadura de is terras at giau privilègiu a is atras colturas chi faint guadangiai de prusu, po custu i bingias de crannaccia funt stetias bogadas casi tottus (oi ddui funti sceti deghi ettarus po custas bingias).